پاکستان پیپلز پارٹی کا حکومت کے خلاف کراچی سے لانگ مارچ کا آغاز

مہر خبررساں ایجنسی نے ایکس پریس کے حوالے سے نقل کیا ہے کہ پاکستان پیپلز پارٹی نے پاکستانی حکومت کے خلاف کراچی مزار قائد سے لانگ مارچ کا آغاز کردیا ہے۔ اطلاعات کے مطابق پیپلز پارٹی نے حکومت کے خلاف مزار قائد سے لانگ مارچ کا آغاز کردیا۔ اس موقع پر سیکڑوں کارکنان درجنوں گاڑیوں میں شہر اور ملک کے دیگر حصوں سے مزار قائد پہنچے۔ کارکنان نے پارٹی پرچم اٹھائے ہوئے تھے جب کہ وہ وقفے وقفے سے پارٹی کے حق میں اور حکومت کے خلاف نعرے بھی لگاتے رہے۔ اس موقع پر بلاول نے کارکنوں سے خطاب کرتے ہوئے کہا کہ نیازی کو بھگا کر جمہوری نظام لائیں گے، عمران خان کی حکومت کرپٹ ترین حکومت ہے جس نے کرپشن ختم کرنے کا وعدہ کیا مگر عمران خان کے دور حکومت میں کرپشن کے سارے ریکارڈ توڑ چکے ہیں۔

چیئرمین پی پی نے کہا کہ نالائق نیازی نے ملک کی معیشت کوتباہ کردیا، تین سال دیکھ چکے اب سلیکٹڈ اور کٹھ پتلی کو گھر جانا ہے، کٹھ پتلی کے خلاف کراچی کے عوام احتجاج کرنے پر مجبور ہوچکےہیں۔ واضح رہے کہ پیپلز پارٹی کے مطابق ان کا یہ لانگ مارچ دس دنوں میں 34 شہروں سے ہوتا ہوا اسلام آباد پہنچے گا۔